Komuna e Mamushës dhe Komuna e Havzës (Samsun, Turqi) nënshkruan protokollin e binjakëzimit, me qëllim të forcimit të bashkëpunimit ndërmjet dy komunave dhe krijimit të mundësive për realizimin e projekteve të përbashkëta.
Kryetari i Komunës së Havzës, Murat İkiz, së bashku me delegacionin e përbërë nga anëtarë të Kuvendit Komunal të Havzës dhe përfaqësues të organizatave të shoqërisë civile (OJQ), zhvilloi një vizitë në Komunën e Mamushës.
Kryetari i Komunës së Havzës, Murat İkiz, dhe delegacioni që e shoqëronte u pritën në zyrën e kryetarit nga Nënkryetari i Komunës së Mamushës, Rujdi Mazrek, së bashku me drejtorët komunalë.
Pas takimit të zhvilluar, protokolli i binjakëzimit ndërmjet dy komunave, i cili synon të kontribuojë në fushën e arsimit, rinisë, solidaritetit ndërmjet pushteteve lokale dhe zhvillimit institucional të komunave, u nënshkrua nga Kryetari i Komunës së Havzës, Murat İkiz, dhe Nënkryetari i Komunës së Mamushës, Rujdi Mazrek.
Përmes këtij protokolli synohet forcimi i miqësisë dhe solidaritetit ndërmjet dy komunave, rritja e shkëmbimit të njohurive dhe përvojave, zhvillimi i aktiviteteve të përbashkëta në fushën e arsimit dhe rinisë, si dhe avancimi i bashkëpunimit të ndërsjellë.
Urojmë që ky bashkëpunim i rëndësishëm të jetë në të mirë të të dy komunave dhe qytetarëve të tyre. Njëkohësisht, falënderojmë Kryetarin e Komunës së Havzës, z. Murat İkiz, dhe delegacionin që e shoqëronte për vizitën e tyre miqësore.
